Bolalarda chov churrasi

Chov churrasi nima?

Ona qornida moyak yorgʻoqqa tushayotganda hosil boʻladigan kanal (processus vaginalis) yopilmay qolsa, shu ochiq kanal orqali qorin boʻshligʻidagi ichak chovga yoki yorgʻoqqa chiqadi. Qizlarda esa shu kanalning oʻxshashi boʻlgan Nuk kanali orqali chovga ichak, baʼzan tuxumdon chiqadi. Bu chov churrasi deb ataladi.

Bolalarning taxminan 1–5%ida, chala tugʻilganlarda esa koʻproq uchraydi. Oʻgʻil bolalarda qizlarga qaraganda taxminan 6 baravar koʻp, oʻng tomonda koʻproq uchraydi.

Belgilari

• chovda yoki yorgʻoqda yumshoq boʻrtma,
• boʻrtma bola yigʻlaganda, kuchanganda, yoʻtalganda kattalashadi,
• bola tinchlanganda yoki yotganda kichrayadi, yoʻqoladi,
• odatda ogʻriqsiz.

Qisilgan churra

Churraning eng xavfli asorati qisilishdir: churraga chiqqan ichak yoki tuxumdon ichkariga qaytmaydi. Qon bilan taʼminlanishi ham buzilsa, toʻqima zararlanishi mumkin. Ikkala holatda ham jarrohning shoshilinch koʻrigi kerak. Qisilish koʻpincha birinchi yilda yuz beradi.

Belgilari:

• boʻrtma qattiqlashadi, ogʻriqli boʻladi va ichkariga qaytmaydi,
• ustida qizarish yoki koʻkarish,
• qusish, qorin dam boʻlishi, toʻxtovsiz yigʻlash.

Bu shoshilinch holat. Shifokor koʻpincha churrani qoʻl bilan ehtiyotkorlik bilan joyiga sola oladi, soʻng 1–3 kun ichida operatsiya qilinadi. Joyiga solib boʻlmasa, shoshilinch operatsiya kerak.

Davolash

Chov churrasi oʻz-oʻzidan oʻtmaydi. Yagona davo usuli operatsiya, qisilish xavfi tufayli u tashxisdan keyin uzoq kechiktirilmasdan oʻtkaziladi.

Ikki usul bor:

• Ochiq usul: chov burmasidagi 1,5–2 sm lik kesik orqali ochiq kanal topilib bogʻlanadi.
• Laparoskopik usul: kindik orqali kiritilgan kichik kamera yordamida kanal ichkaridan yopiladi, bir vaqtning oʻzida boshqa tomon ham koʻriladi.

Ikkala usul ham xavfsiz, bola odatda oʻsha kuni uyiga ketadi. Batafsil: chov churrasi operatsiyasi.