Sünnətdən sonra problemlər və onların düzəldilməsi

Normal sağalma necə görünür?

Sünnətdən sonra ilk günlərdə bunlar normaldır:

• penisin başında və dərinin kəsik xəttində şişkinlik,
• ilk 1–2 həftədə penisin başında yaş, sarımtıl örtük,
• sidiyə gedərkən bir neçə gün yüngül yanma,
• tikişlərin 1–3 həftə ərzində öz-özünə düşməsi.

Ətraflı: əməliyyatdan sonra evdə qulluq.

Erkən problemlər

• Qanaxma. Ən çox rast gəlinən erkən problemdir. Çox vaxt sarğı üzərindən 10 dəqiqə yüngül basmaqla dayanır. Dayanmırsa, dərhal həkimə müraciət edin.
• İnfeksiya. Qızartının yayılması, irin, qızdırma.
• Sidiyə gedə bilməmə. Sarğı və ya şişkinlik sidik dəliyini sıxdıqda.

Gec problemlər

• Mea darlığı. Sidik dəliyinin daralması. Sidik nazik, yuxarı yönəlmiş və ya uzaq axır, uşaq sidiyə gedərkən ağrı hiss edir. Sünnətdən aylar, illər sonra yarana bilər.
• Dəri körpüləri və bitişmələr. Kəsilmiş dərinin kənarı penisin başına yapışıb sağalır.
• Az kəsilmiş dəri. Dəri penisin başını yenidən örtür, iltihab və ya kosmetik narahatlıq yaradır.
• Çox kəsilmiş dəri. Ereksiya zamanı dərinin gərilməsi, ağrı.
• Gömülmüş (sıxışmış) penis. Xüsusən qarnın aşağı hissəsində piy toxuması çox olan körpələrdə kəsik xəttindəki çapıq penisi içəriyə çəkir və həlqə kimi sıxır.
• İnkluziya kistaları. Kəsik xəttində kiçik, ağ kistalar.
• Sidik kanalında fistula və penisin başının zədələnməsi: nadir, amma ciddi fəsadlardır.

Sünnətdən əvvəl nəyə diqqət etməli?

Bəzi uşaqlarda sünnət edilməməlidir və ya əvvəlcə başqa problem həll olunmalıdır:

• hipospadiya, xüsusən yarım sünnətli görünən uşaqlar,
• gömük penis və torlu penis,
• penis əyriliyi,
• qanaxma meyli.

Bu vəziyyətlərdə sünnət dərisi düzəliş əməliyyatı üçün lazım ola bilər. Ona görə sünnətdən əvvəl uşaq həkim tərəfindən müayinə olunmalıdır.

Düzəliş əməliyyatları

Əksər fəsadlar planlı şəkildə, adətən narkoz altında düzəldilir: mea genişləndirilir, körpülər kəsilir, artıq dəri çıxarılır, sıxışmış penis sərbəstləşdirilir. Uşaq çox vaxt həmin gün evə gedir.